Milyonların qatıldığı yürüşdə Azərbaycan şəhidlərinin xatirəsi anıldı

Hər il milyonlarla insanın iştirak etdiyi Ərbəin yürüşündə bu il də Azərbaycanın Vətən müharibəsi şəhidlərinin xatirəsi anılıb. Şəhidlərimizin fotoları zəvvarların yolu boyunca dirəklərdən asılıb və plakatlar formasında nümayiş etdirilib.

Qeyd edək ki, Ərbəin – Həzrət Məhəmməd Peyğəmbərin (s) nəvəsi, üçüncü İmam Hüseynin (ə) şəhadətinin qırxıncı ildönümü kimi bir çox ölkələrdə qeyd edilir. Son bir neçə il ərzində müsəlmanların izdihamlı Ərbəin yürüşü həyata keçirilir. Dünyanın müxtəlif ölkələrindən İraqa axışıb-gələn on minlərlə müsəlman piyada halda kilometrlərlə yolu qət edib, səfər ayının 20-də (Ərbəin günündə) İmam Hüseynin (ə) Kərbəladakı məzarını ziyarət edir. Statistik hesabatlara görə, ötən il Ərbəin yürüşündə 22 milyon nəfərdən artıq şəxs iştirak etmişdir.

İraq rəsmiləri bu il avqust ayının 6-dan 19-na kimi 9240 nəfər azərbaycanlı zəvvarın ölkə ərazisinə daxil olduğunu xəbər verir.