İngiltərənin cənubundakı Pisheven şəhərində məscidin yandırılmasında şübhəli bilinən üç nəfər saxlanılıb.
Az.shafaqna.com xəbər verir ki, hadisə oktyabrın 4-də yerli vaxtla saat 21:50-də baş verib. Maskalı iki nəfər məscidə girməyə cəhd edib, lakin qapını aça bilməyiblər. Bundan sonra onlar binanın giriş hissəsini yanar maye ilə tökərək od vurublar.
Yanğın zamanı içəridə imam və bir nəfər ibadətçi olub. Onlar vaxtında binanı tərk edərək xəsarət almayıblar.
Polis Pisheven şəhərindən olan 34 və 42 yaşlı iki kişini, həmçinin Siford şəhərindən olan 38 yaşlı bir nəfəri saxlayıb. Onların hamısı həbs edilib və onlara qəsdən yanğın törətmə və adam öldürməyə cəhd ittihamı irəli sürülüb.
İstintaqı aparan Surre və Sasseks bölgəsinin baş inspektoru Mark Kullimor bildirib:
“Biz hadisəni çox ciddi şəkildə araşdırırıq, çünki baş verənlər zərərçəkənlərə və bütün icmaya ağır zərbə vurub. Bütün mövcud dəlilləri toplayırıq və müxtəlif versiyaları nəzərdən keçiririk. Məmurlarımız yerli sakinlərlə əlaqə saxlayır və hadisə barədə hər hansı məlumatı olanları polisə müraciət etməyə çağırırlar”.
