İnsan dörd rükətli zöhr namazını qılmağı niyyət edir. Qoşa səcdədən sonra şəkk edir ki, üçüncü ya dördüncü rükətdədir. Bu halda nə etməlidir?

Namaz zamanı şəkkə düşən şəxs əvvəlcə fikirləşməlidir. Gümanı hansı tərəfə daha güclüdürsə, onu qəbul etməli və namazı buna uyğun davam etdirməlidir. Əgər gümanı hər iki tərəfə eynidirsə, bu zaman şəkkin hökmlərinə uyğun davranmalıdır. Namazın bütün şəkk məsələləri şəriət kitablarında (risalədə) ətraflı izah edilib.

Üç ya dörd rükət namaz qılmasına şəkk etmək səhih (düzgün), yəni namazı batil etməyən və etina olunmalı şəkkdir. İnsan dördrükətli namazın hansı yerində olursa olsun, üç ya dörd rükət qılmasına şəkk etsə, hər iki tərəfə gümanı eyni olsa, dördüncü rükətdə olduğunu qəbul etməlidir. Buna uyğun olaraq namazı tamamlamalı, sonra bir rükət ayaq üstə və ya iki rükət oturaq halda ehtiyat namazı qılmalıdır. Ayaq üstə ehtiyat namazının qılınma qaydası budur ki, namazı bitirən kimi dərhal, qiblədən dönmədən və artıq hərəkət etmədən ehtiyat namazı niyyəti etməli, təkbir deyib, təkcə Fatihə surəsini (başqa surəsiz) oxumalı, rüku və qoşa səcdə edib təşəhhüd və salamları söyləməlidir. Bu qayda dördrükətli namazlarda üçüncü ya dördüncü rükət arasında şəkk zamanı keçərlidir.