Quranda deyilir ki, Adəmlə Həvva cənnətdən endirilmişlər. Bu endirilmə hansı şəkildə olmuşdur?

Qurani-Kərimdə Həzrət Adəm (ə) ilə Həvvanın əhvalatından danışılarkən buyurulur: “Biz də (Adəmə, Həvvaya və Şeytana): “Bir-birinizə düşmən kəsilərək enin! Yerdə sizin üçün müəyyən vaxta qədər (ömrünüzün axırınadək) sığinacaq və yaşayış (dolanacaq) vasitələri var”,-dedik” (Bəqərə, 36). Ayədəki “hübut”, yəni “eniş” məsələsini bəziləri yuxarıdan aşağıya enmək, atılmaq kimi qəbul etmişlər. Xalq içində gəzən təsəvvürə görə də, Allah-Taala Adəmlə (ə) Həvvanı guya səmada olan cənnətdən qovlayıb yerə atmışdır. Amma əksər təfsir kitablarında bu düşüncə yanlış qəbul edilir. Adəm (ə) və Həvvanın enişi məkan mənasında deyil, mənəvi məqam mənasında baş vermişdir. Yəni onlar cənnətdə malik olduqları məqamdan məhrum olmuşlar. Əslində onların cənnəti də yerdən kənar deyil, yer üzərində olmuşdur. Yəni o cənnət (hərfi mənada bağça) qiyamətdən sonra möminlərin yerləşdiriləcəyi behişt deyildi. Yaxşı insanlar öz əməllərinə görə qiyamətdə behişti qazanacaqlar, bütün bəşəriyyətin əvvəldən behiştdə yaşaması mümkün deyil. Bəşəriyyət məhz yer üzərində yaşamaq üçün yaradılmışdı.