Həzrət Mühəmməd Peyğəmbərlə (s) həyat yoldaşı Xədiceyi-kübra qohum olmuşlarmı?

Ərəb ənənəsinə görə, eyni qəbilənin bütün üzvləri bir-biri ilə qohum sayılırlar. Adətən, qəbilənin ulu əcdadı bir nəfər olur və bütün qəbilə üzvləri onun nəslindən gəlir. Məkkədə yaşayan Qüreyş qəbiləsi ərəblərin ən şərəfli qəbiləsi sayılırdı. Qüreyşin bir neçə qolu var idi, bunlardan biri də Haşmilər qolu idi. Həzrət Mühəmməd Peyğəmbər (s) Haşimilər qolundan idi. Xədiceyi-Kübra da Qüreyş qəbiləsinə mənsub idi, amma Haşimilərdən deyildi. Onun mənsub olduğu nəsil də Qüreyşin hörmətli qolu kimi tanınırdı.
Xədiceyi-kübra ilə Peyğəmbərimizin nəsli Qüseyydə birləşirdi. Belə ki, Qüseyy Həzrət Mühəmmədin (s) beşinci, Xədicənin dördüncü ulu babası idi. Peyğəmbərin atasının babası Haşim ilə Xədiceyi-Kübranın babası Əsəd əmioğlu olmuşlar.