Zülqərneyn də peyğəmbər idimi?
Zülqərneyn Qurani-Kərimdə adı çəkilən şəxsiyyətlərdən biridir. Öz zamanının qüdrətli hökmdarı olmuş, Allaha iman gətirmiş, ədalətlə hökm etmişdir. Dünyanın həm şərqinə, həm də qərbinə hakim olmuşdur. Yəcuc-Məcuc tayfasının yaşadığı yerə kimi gəlmiş, orada bu azğın tayfanın hücunlarının qarşısını almaq üçün möhkəm sədd çəkdirmişdir. Bəzi araşdırmaçılar onu Makedoniyalı İsgəndərlə eyniləşdiriblər, amma bu nəzəriyyə yanlışdır. Çünki əvvəla, hədislərə görə Zülqərneyn Həzrət İbrahim Peyğəmbərlə (ə) müasir olmuşdur, bu isə Makedoniyalı İsgəndərin zamanından çox-çox əvvəllərə təsadüf edir. İkincisi, İsgəndər bütpərəst idi, amma Zülqərneynin mömin olduğu məlumdur. Bəzi mənbələrdə Zülqərneynə peyğəmbərlik verildiyi barədə fikirlər vardır, amma bu öz təsdiqini tapmayıb. Üstün olan fikrə görə, Zülqərneyn peyğəmbər yox, çox qüdrətli, mömin və ədalətli bir hökmdar olmuşdur.
