Müshəf nədir?

Bu sözün ərəb dilindən tərcüməsi “səhifələnmiş, səhifə halında olan” deməkdir. Qurani-Kərimin adlarından biri kimi işlədilir. Dini mənbələrdə, xüsusilə hədislərdə Quran mənasında bu sözdən çox istifadə edilib. Həzrət Mühəmməd Pey­ğəmbərin (s) sağlığında vəhy ardıcıl olaraq davam etdiyi üçün Quran hələ bütövlükdə köçürülməmişdi və yazı halında mövcud deyildi. Ayrı-ayrı ayələr vəhy katibləri tərəfindən yazıya alınırdı. Ayələr dəri parçalarının, gil lövhələrin və s. üzərində həkk edilmişdi. Buna görə də o zamanlar adətən Qurana “müshəf” deyilmirdi. Peyğəmbərin vəfatın­dan sonra Quran ayələri bütövlükdə yazıya alınıb toplu halına gətirildi. Bu işi ilk görən şəxsin İmam Əli (ə) olduğunu yazırlar. O vaxtdan etıbarən Müqəddəs Kitaba həm də “müshəf” deməyə başladılar. İmam Əlinin (ə) toplayıb həm də qısa şərh yazdığı nüsxəyə “Əlinin (ə) müshəfi” deyirdilər.